Friday, November 28, 2008

စိုးရိမ်ခြင်း၏ဒုက္ခ

ကျွန်မတို့ စိုးရိမ်ပူပန်မှုတွေ များလာသောအခါ ကျွန်မတို့ ကိုယ့်ကိုယ်ကို ယုံကြည်မှုမရှိ ဖြစ်လာပါတယ်။ ကျွန်မတို့ ကိုယ့်ကိုယ်ကို ယုံကြည်မှုရှိနေရင် စိုးရိမ်ပူပန်မှု ရှိလာမှာ မဟုတ်ပါဘူး။ ဘာကြောင့် ကျွန်မတို့ စိုးရိမ်မှု ဖြစ်ရတာလဲ။ တချို့ကတော့ ကျန်းမာရေးအတွက် စိုးရိမ်ပူပန် နေတတ်ကြပါတယ်။ တချို့က စီးပွားရေးနှင့် ပတ်သက်ပြီး စိုးရိမ်မှုတွေ များပြီး စိတ်ဓာတ်ကျ နေကြပါတယ်။ တချို့က အိမ်တွင်းရေး ပြဿနာတွေနဲ့ သောက ရောက်နေကြပါတယ်။ တချို့က အနာဂတ်မှာ ဘာဖြစ်လာမလဲဆိုသော ကံကြမ္မာကိုတွေးပြီး စိုးရိမ်ပူပန်ကြပါတယ်။ တချို့ကျတော့ လုပ်ငန်းခွင်မှာ မိမိတာဝန် ယူထားသည့် အလုပ်ကိစ္စများအတွက် စိုးရိမ်ပူပန်ကြပါတယ်။ ကျွန်မဆိုလျှင် စိုးရိမ်ပူပန်မှု အရမ်းများပါတယ်။ ကျွန်မ စိုးရိမ်ပူပန် လာပြီဆိုလျှင် မျက်နှာပျက်ပြီး လက်ဖျားခြေဖျားတွေ အေးတဲ့အထိ ဖြစ်လာပါတယ်။ ကျွန်မ စိုးရိမ်နေတဲ့နေ့ဆိုလျှင် ကျွန်မစိတ်တွေက မငြိမ်မသက်ဖြစ်ပြီး အရမ်းစိတ်လှုပ်ရှား လာပါတယ်။ အရမ်းငိုချင်လာသလို ၀မ်းနည်းမှု မျိုးများ ဖြစ်လာပါတယ်။ အဲဒီလို စိုးရိမ်မှုတွေ ဖြစ်လာရင် ကျွန်မတနေ့လုံး မပျော်ရွှင်တော့ပါဘူး။ အဲဒီလို စိုးရိမ်မှုဖြစ်ရတာ ကျွန်မကိုယ် ကျွန်မယုံကြည်မှု မရှိလို့ ဖြစ်ရတာပါ။ အဲဒါကို ကျွန်မ သိနေပါတယ်။ ဒါပေမယ့် ကျွန်မရဲ့ စိုးရိမ်စိတ်ကို ကျွန်မ အခုအချိန်ထိ ဖျောက်ဖျက်လို့မရ ဖြစ်နေပါတယ်။
စိုးရိမ်ပူပန် နေရုံသက်သက်နဲ့ အခြေအနေတွေကို ပြောင်းလဲမပစ်နိုင်ပါဘူး။ စိုးရိမ်ပူပန်မှုဟာ ဘာကိုမှ မပြီးမြောက်စေပါဘူး။ စိုးရိမ်ပူပန်မှုဟာ အခုဖြစ်ပေါ်နေသော မိမိ၏ဒုက္ခကို မကယ်တင်နိုင်သလို မိမိဆီ ကျရောက်လာမည့် အန္တရာယ်ကို လည်း ကာကွယ်မပေးနိုင်ပါဘူး။ အလုပ်ခွင်မှာ စိုးရိမ်ပူပန်မှု များနေလျှင် မိမိလုပ်ဆောင်ရမည့် အလုပ်များ မပြီးမြောက် နိုင်ပါဘူး။ အိမ်တွင်းပြဿနာတွေ အပေါ်မှာ မိခင်တစ်ယောက် လုပ်သူသည် စိုးရိမ်ပူပန်မှု များနေလျှင် ဖြစ်ပေါ်နေသော ပြဿနာသည် ပို၍ကြီးထွား လာရုံသာ ရှိပါမည်။ တကယ်တော့ စိုးရိမ်မှုဟာ မနက်ဖြန်ဆိုတဲ့ အနာဂတ်ကို ကြောက်ရွံ့နေ သောကြောင့် ဖြစ်ပေါ်လာခြင်း ဖြစ်ပါသည်။ ဒါပေမယ့် မနက်ဖြန်ကို ကျွန်မတို့ မမြင်နိုင်သလို၊ ကြိုတင်ပြီးလည်း ဘယ်သူမှ မသိနိုင်ပါဘူး။ စိုးရိမ်ပူပန်မှုဟာ မနက်ဖြန်ရဲ့ သောကကို ဖယ်ရှားရှင်းလင်း မပေးနိုင်သည့်အပြင် ဒီကနေ့တွင် ဖြစ်ပေါ်နေသော မိမိ၏ ပျော်ရွှင်မှုများကိုပါ အမှန်တကယ် ပျောက်ကွယ်သွားစေနိုင်ပါသည်။ ကျွန်မလည်း စိုးရိမ်ပူပန် မှုများ မဖြစ်ပေါ်စေရန် ကြိုးစားပါတော့မယ်။ သူငယ်ချင်းတို့လည်း ကျွန်မလိုစိုးရိမ်ပူပန်မှုများ မဖြစ်ရအောင် ရေးသား တင်ပြလိုက်ခြင်း ဖြစ်ပါသည်။ စိုးရိမ်မှုဟာ ယုံကြည်မှုနဲ့ ဆိုင်ပါတယ်။ သူငယ်ချင်းတို့လည်း မိမိကိုယ်မိမိ ယုံကြည်မှု ရှိသော သူများဖြစ်ကြပါစေလို့ ဆုတောင်းရင်း ဒီစာလေးကို ကျွန်မ နိဂုံးချုပ်လိုက်ပါတယ်။ စိုးရိမ်မှုဟာ လူတိုင်းရဲ့ မနက်ဖြန်ကို လှပမှုမဖြစ်စေပါဘူး။
ယု

No comments: